عازفة الناي ندى سلامة تنفي وفاتها
أعلنت “ندى سلامة” أنها على قيد الحياة، نافية الخبر الذي انتشر في الصحافة ووسائل الإعلام الاجتماعي عن وفاتها، وكتبت منذ قليل على صفحتها على موقع النواصل الاجتماعي فيسبوك
ما يلي
” انا ندي ولسه عايشه لو معني اني بتنفس اني لسه عايشه ، يمكن ده هيكون اطول شئ اكتبه ويمكن يكون آخر شئ اكتبه واهتم للناس فأكتبلهم ، انا حاولت انتحر اكتر من 5 مرات في 3 ايام وكل ده عشان بواجه مشاكل زي اللي الناس بتقابلها بس المشاكل دي كانت اكبر مني ومكنتش عايزه اورط حد فيها لانها كلها مشاكل انا السبب فيها انا اللي عملتها بس كنت جبانه اني اواجها ، احنا عايشين في عالم وسخ ، انا وسخه كمان زي العالم ده ساعات بنستحمل وساختنا بس مبنعرفش نستحمل وساخه العالم ، الموت شئ عظيم ممكن يخلصك من مشاكلك في دقيقه ويخلي كل الناس تسامحك علي كل وساختك ، بس الغريب هما ليه مهتمين بوجود الجسد كله بيدور حواليين جسدك طول ما جسدك موجود هيكرهوك واول ما يختفي هيحبوك ، ان كان الاعتذار واجب فبعتذر للناس اللي مش مهتمه لوجودك ولوساختك بس انت اللي تهمهم في اي مكان ، هتعامل مع مشاكلي وانهيها واخد فرصه جديده للحياه في عالم وسخ من غير ما اكون وسخ ، وفر اي طاقه تفكير هتفكر فيها عني وعن حياتي او عن موتي او عن مشاكلي او عن علاقتك بيا وفرها لحياتك في العالم الوسخ ، ووفر اي محاوله تواصل معايا حاليا ، انا شخص غير جيد لإي شئ في الحياه لحد ما ابقي جيده كفايه لنفسي ، اكرهني او حبني ده مش هيغير شئ في يومك “
كان محبو ندى سلامة، قد فوجئوا بخبر رحيلها أمس الأحد الذي أثار الكثير من مشاعر الحزن والأسى. وبدأ أصدقائها في ترك رسائل التوديع والحب والامتنان للحظات التى عاشوا فيها مع ندى، وما تركته في حياتهم من اثار طيبة.
،
وكان الفنان المسرحي علي قنديل أول من أعلن خبر الوفاة مؤكدا أنه اتصل بشقيقة ندى “سحر” التي أكدت خبر جنازتها ودفنها بعد صلاة ظهر يوم السبت في محافظة كفر االشيخ، ونقل عنها أنه لم يتم تحديد موعد العزاء بعد، وعنه انتشر خبر الوفاة
وعاد الفنان علي قنديل ليؤكد أن شقيقة ندى ، سحر، قد خدعته وأخبرته بموت ندى على غير الحقيقة، محاولة حمايتها من مشكلات، على حد قوله، وسرد تفاصيل المكالمة بينه وبين الشقيقة سحر.
“على النحو التالي:
ليه ندى فضلت ساكتة وبعد م الدنيا ولعت والناس بدأت تشتمني.. بعتت تعتذرلي عن اللي أختها عملته معايا؟؟؟
1-
جميل..
إن حد يحب إنسانة فعلاً كانت عزيزة عليه فوق الوصف، وكان بيحاول طول الوقت يمنع عنها الأذى ويحميها من نتايج أخطائها
مشهد إتكرر كتير.. إن حد “له حق عند #ندى_وهيب” يجي لي بيتي ويقولي: “انت عارف إني أقدر أعمل وأسوّي في ندى بس عامل إحترام ليك عشان عارف إنها صاحبتك”
المشهد ده إتكرر كتير.. وكل مرّة كنت بطلب الصبر وعدم إيذائها..
وأنا عارف كويس أوي إنهم لو أذوها يبقى حقهم..
الموضوع دخل فيه فلوس وبمبالغ اللي أعرفه منها يعدي ال 70 ألف جنيه!
بالمناسبة انا بعتذر لكل واحد أنا مَنعْته ياخد حقه منها!
(حضر الموضوعات دي صديقي @Abd El-Rahman Magdy
2-
يجيني خبر وفاتها.. أتصدم، وقلبي يتكسر..
أزعل إنها ماتت، وإنها ماتت وهي مسببّة مشاكل لناس كتير
وأحزن جداً لإنها بهدلت نفسها ومكانش ينفع تعمل كل ده
أتصل بأختها.. “#سحر_وهيب“.. اللي فكرتي عنها إنها إنسانة طيبة ومحترمة ومش بتاعة لف ودوران
3-
تفاصيل المكالمة:
علي: سلام عليكوا..
سحر: وعليكم السلام
علي: أنا علي قنديل يا سحر..
سحر: أهلا يا علي إزيك..
علي: الحمد لله بخير،،، سحر أنا بسمع حاجات غريبة ومش مستوعب.. هي ندى مالها..
سحر: (تبكي) أيوه يا علي..
علي: !!!! ندى اتوفت؟
سحر: الله يرحمها.. إحنا دفنّاها امبارح في البلد في كفر الشيخ.. ولسه راجعين النهاردة الصبح..
علي: لا حول ولا قوة إلا بالله.. لا حول ولا قوة إلا بالله!! طب انتوا فين دلوقتي؟
سحر: في البيت..
علي: طب آجي لكوا ازاي؟
سحر: (تبكي) لا مش هينفع إحنا تعبانين ومش قادرين نقابل حد يا علي معلش.. أنا آسفة بجد
علي: لا أبداً مستوعب يا سحر.. لا حول ولا قوة إلا بالله! طب العزا فين؟
سحر: مش عارفة والله يا علي أنا معرفش أي حاجة..
علي: طب سحر.. ده رقمي الخاص أرجوكي لو احتاجتي أي حاجة كلّميني على طول.. انتي عارفة ندى بالنسبة لي إيه..
سحر: (منهارة) أكيد يا علي عارفة طبعاً ربنا يخليك..
علي: ربنا يرحمها يا رب.. أنا مش هطوّل عليكي عشان عارف إنك أكيد تعبانة دلوقتي.. تليفوني مش هيتقفل يا سحر.. أرجوكي أول م تحتاجتي حاجة قوليلي..
سحر: (باكية جداً) حاضر يا علي.. متشكرة جداً بجد
علي: ربنا يرحمها يا رب.. سلام عليكم
……………………………
4-
المكالمة دي بعد مكالمة مع صديقي Taha Desouky
قالي إن سحر بعتت له رسالة (بتطلب منه) يقول للناس خبر وفاة ندى!!
لحد م أنا اتصلت بسحر أخت ندى وأكدّت لي الخبر زي م حكيتلكوا كده!
بالمناسبة “سحر” طلبت نفس الطلب من حسام أنتيكا المُصوّر
……………………….
5-
إيه الحكمة من الموقف ده؟
وليه “ندى وهيب” م انكرتش ده؟
وليه “سحر” أختها تقول للناس إنها اتوفت؟؟
وليه في الآخر أنا اللي أدفع تمن حزني عليها والناس تشتمني أنا وكإني أنا اللي اخترعت قصة وفاتها؟؟
عدد مهول من الناس بيشتمني أنا دلوقتي!!!
رسايل وتعليقات ومنشن!!
ويقولولي إبقى إتأكد عشان متسوّحش الناس؟ هو لما أختها ترد عليّ وهي بتعيّط ومنهارة وتقولي إنهم خلاص دفنوها!!! عايزني أتأكد من مين؟
…………………….
الخلاصة..
امبارح.. كنت في منتهى الحزن على إنسانة بحبّها جداً ومقصّرتش معاها..
والنهاردة بتشتم لإني بلّغت الناس بخبر وفاتها أملاً في إن ربنا يكتب لها دعوات صادقة بالرحمة والمغفرة ولآخر سطر كنت ببعت رسالة لكل اللي زعلانين منها يسامحوها!
وقفشت مع ناس كتير جداً أشاعوا خبر انتحارها لإنه غير مؤكد! وأنا مجيبتش سيرة انتحار أصلاً!
من النهاردة أنا معرفش واحدة اسمها ندى سلامة وهيب، ومش هحب أبداً إن حد يفتح معايا الموضوع ده تحت أي ظرف!
وبالمناسبة: إكتشفت النهاردة إن اسمها الحقيقي “#هند” مش #ندى !
أتمنى نعمل شير للصح.. زي م عملنا شير للغلط
ربنا يسامحها هي وأختها وكل اللي بيشتموني
شكراً!
“
