حاورتها ـ منة حسام الدين:
الجدل الواسع الذي أحدثه فيديو فعالية “الرقص في مصر الجديدة ” ، لم تتوقعه سالي سلامة، الفتاة العشرينية المحجبة، خريجة كلية الإعلام، التي وقفت في الصف الأول تقود المشاركات، اللواتي شاركتهن تنظيم ذلك اليوم في مناسبة “الفالنتين” ، لحث المرأة على أن تحب نفسها وجسدها وتنكر وتعترض على أي عنف يمارس ضدها.
في موقع “زحمة” حاورنا سالي سلامة، للتعرف منها على أسباب تنظيمها لذلك الحدث ضمن إطار حملة “مليون ثائر من أجل العدالة”، وأهم التعليقات التي تلقتها خاصة الانتقادات التي طالتها بسبب حجابها، وأخبرتنا سالي بما يلي :
– عايزين المرأة تحب نفسها، واحنا مارقصناش:
ـ نظمت الحدث دا بمشاركة صديقات لي، واخترنا “الفالتين” عشان الناس كلها بتبقى مركزة فيه وبتتابع الفعاليات اللي بتحصل فيه، وعشان نقول للمرأة تحب نفسها وتنكر أي عنف تتعرض له.
ـ احنا مارقصناش في الشارع، الناس إللي بتقول رقصنا لازم يبصوا للموضوع بعمق أكتر، ويبطلّوا سطحية، إحنا عملنا حركات معينة على إيقاع الأغنية الرسمية لحملة “مليون ثائر من أجل العدالة” وهي “
” BREAK THE CHAIN
إحنا كنا عايزين نعمل حاجة مختلفة وغير مألوفة تخلي الناس تركز معانا وتحاول تعرف رسالتنا إللي هي منع العنف ضد المرأة والاعتراض على التحرش إللي بنتعرض له لأن الشارع ملكنا كلنا.
وسط البلد
ـ كان نفسنا نعمل إيفينت “مليار ثائر من أجل العدالة” في التحرير ووسط البلد، لكننا للاسف خفنا من التحرش إللي بقت تشتهر بيه المنطقة دي، يعني خفنا من السبب إللي خلانا ننظم حدث زي دا .
ـالكوربة كانت اختيارنا لـكن كل شارع ببيحصل فيه تحرش ولو بشكل مستخبي، في الكوربة محدش كلمنا أو اتعرض لينا بس كان في نظرات قرف زي ما شفت ابتسامة على وجوه بعض الناس برضه، حتى وإحنا بنؤدي آخر الحركات انضمت لينا ست غلبانة وقعدت ترقص بطريقتها وتزغرط.
ـ الناس إللي بتنتقدني إني محجبة ورقصت في الشارع، فأنا هكرر وأقول أني مارقصتش ولا عملت حاجة خليعة، عارفة أن حركات زي إللي عملنها ممكن تبقى حرام وغير مألوفة بس التحرش نفسه حرام والمتحرش لما بيتحرش بواحدة مش بيفرق بين المحجبة أو غير المحجبة، وربنا لما هيحاسبنا مش هيحكم على المحجبة بطريقة وغير المحجبة بطريقة تانية.
ـ مش كل البنات اللي شاركت في تأدية الحركات أهاليهم موافقين، لكن برضه سابوهم يعبروا عن موقفهم ، وفي أهالي كتير من أهالي البنات المشاركة جت ووقفت حوالينا لحمايتنا. بابايا هو اللي صور الفيديو وكان قلقان عليا هو ومامتي بس إحنا كان هدفنا نوصل رسالة أعتقد أننا قدرنا نعمل دا، لأني من امبارح وأنا مخضوضة من حجم ردود الأفعال.
:مش الوحيدة
ـ على فكرة مكنتش المحجبة الوحيدة إللي كانت موجودة بين البنات يوم الجمعة، كان في 4 بنات كمان، وكلنا ما كناش نعرف بعض، كل واخحدة اتدربت عل ىالأغنية في بيتها لإننا كلنا نزلنا الفيديو الخاص بحركة مليار ثائر من أجل العدالة على فايسبوك، وطلبنا من البنات تشاركنا بالحضور يوم الجمعة بعد التدريب على الأغنية.
ـ حركة “مليار ثائر من أجل العدالة” العالمية، مش بتشترط على إللي بيتبنوا فكرتهم أنهم يرقصوا أو يعملوا حركات على أغنيتهم الرئيسية، ممكن أي واحدة تنزل في الشارع وتقف ساكتة، بس إحنا اختارنا نعمل
حاجة غير مألوفة اجتماعيا ودينيا عشان نخلي الناس يركزوا معانا ومع قضيتنا.
:هانعملها تاني
ـ بنحاول دلوقتي نترجم أغنية “اكسري السلاسل” للغة العربية عشان نخلى الحدث مصري أكتر ونخلى ناس كتير تشارك فيه، ومن كتر الجدل إللي حصل إحنا هنحاول ننظم الحدث دا تاني ومش نستنى سنة.
ـ عرفت أن دي مش أول مرة يتم الاحتفال بالحدث دا فمصر، في ناس نظموه السنة إللي فاتت في إحدى المدارس، أصل الغاية منه هو نشر قضية مش شرط التواجد في الشارع.
اقرأ وشاهد : الرقص في مصر الجديدة
