السيسي: “أنا شغلت الجيش عندكم” و”مستعدين نمشي” (فيديو)
قال الرئيس عبدالفتاح السيسي ” أنا شغلت الجيش عندكم بيقاتل الإرهاب، شغلته تحت رجليكم، لأجل مصر”، مضيفًا أن الجيش يقوم بدور تنموي موازي دور الدولة تمامًا.
وتابع السيسي خلال الجلسة الخاصة بمواجهة “ارتفاع الأسعار” خلال مؤتمر الشباب الوطني الثالث بالإسماعيلية اليوم الأربعاء” عايزين تعملوا مستقبل حقيقي ولا لا؟ هدفنا هو تثبيت الدولة المصرية عشان متقعش”.
كما أشار السيسي إلى أن الخلل موجود في جميع مؤسسات الدولة ” قال وزير الزراعة لي يجب أن ننشئ مجتمعات متكاملة، بقالنا 3 سنين ونصف معملناش ليه؟ بلاش أسماء، لو كانت مصر دولة متقدمة في أدائها كان الكلام يتحوّل إلى سياسات وآليات، أنا مش بشتكي أجهزة الدولة لكم، أنا بكلمكم على حالنا، وبعدين حد يقولك شيل، فين المصداقية لو كل ما يجي وزير وأمشيه؟ عشان كده نعقد المؤتمر ده لأن الإعلام لن يتمكن من إيصال هذه الرسالة بنفس التجرد والصدق والأمانة دي”.
وقال “لن أتخلى عنكم إلا إذا قلتم امشي، انتم آمنتوني عليها وعلى أولادكم، أنا لا أدخل في صدام مع أجهزة الدولة. وما يحتاج إصلاح سأصلحه لكن بالراحة. ولا أقصد مهاجمة أحد”.
وقال السيسي تعقيبًا على تعليق بشأن تراجع الطبقة المتوسط وتأثيره على الأمن “لو كان أداءنا هو السبب في ما وصلنا إليه؟ إحنا مستعدين نمشي. لكن ده محصلة سنين طويلة من عدم المواجهة وسلبيات كبيرة ولا أقصد إساءة لكنه الواقع. وده اللي خلى القائمين على الدولة لسنين طويلة يتخوفوا من اتخاذ إجراءات لبناء دولة حقيقية خوفًا من رد الفعل اللي انتم فيه دلوقتي ولذلك منفذوش إصلاحات وده أحدث تراكم”.
وتابع السيسي أنه عندما تحركت الجموع في عام 2011 (25 يناير) كان التوصيف الخاص لحجم المشكلة غير حقيقي ” محدش هايقدر يقول الكلام ده غيري، التوصيف لمشكلة مصر خلال الثلاثين سنة الماضية غير حقيقي ونتاج لوعي زائف. وبالتالي قالوا اتحرك وشيل لكن لما تعمل ده تبقى بتشيل مستقبلك. لو عايز تتحرك تاني وتشيل اتحرك انت هتضيع بلدك خالص، ومستقبلك ومستقبل أولادك”.
مضيفًا “إحنا دولة فقيرة، مواردها شحيحة وده بقاله سنين طويلة، دولة ذبحت سنة 67، وحركة تقدمها انتهت من الفترة دي”. مشيرًا إلى أن مصر خاضت حروبًا بتكلفة كبيرة مثل حرب أكتوبر و67 وحرب اليمن”.
وأضاف ” أنا بتكلم عشان انتم لما متعرفوش بتتحركوا ولما بتتحركوا بتهدوا بلدكم وبعدين بلدكم تضيع عشان كده بقول على الهوا عشان تصبروا وتتحملوا وتشاركوا معانا. أنا مقدر أنكم تحملتم وتتحملوا، تحملوا سنة كمان، وبعد كده في انتخابات اختاروا ما شئتم”.
كما تطرق السيسي خلال كلمته إلى ما يجري في اليمن وسوريا، وقال إن الحرب الموجودة في مصر هي “حرب عقول وإعلام وإرهاب. الغرض منها هدم مصر بأهلها وبكاملها”. وقال أن السادات أبرم معاهدة السلام ليتجه لبناء مصر.
واختتم السيسي كلمته بوعد أن يتم توفير السلع الغذائية بأسعار مناسبة خلال الشهر المقبل.
