لقاء حصري مع أبلة فاهيتا: برنامجي تركيبة مرموقة غير مسبوقة ..و”باسم” برواز لازم تدعك وراه الحيطة
حصريا: أبلة فاهيتا تكشف لزحمة دوت كوم عن تفاصيل برنامجها الجديد ” أبلة فاهيتا Live من الدوبلكس” : تركيبة مرموقة وغير مسبوقة.
بين الاستعدادات الأخيرة في مسرح راديو لتصوير برنامج أبلة فاهيتا الجديد “Live من الدوبلكس” ، وسط الإضاءة والعمال والتصوير والحراس، قدرنا في “زحمة دوت كوم” ندخل المسرح من غير ماحد ياخد باله، لكن قبل ما نوصل أوضة أبلة فاهيتا، قبض علينا 2 بودي جارد طوال عراض، قولنا لهم احنا معانا معاد مع أبلة فاهيتا .
.للأسف مصدقوناش وكنا هننضرب ، بس لحسن الحظ أبلة فاهيتا خرجت من أوضتها في نفس اللحظة ولحقتنا، وقالت طب اتفضلوا عشر دقايق بس متعملوش كده تاني.
دخلنا وبسرعة طلعنا ورقة الأسئلة وكنا عايزين نعرف:
زحمة: يا أبلة فاهيتا، هو البرنامج هايبقى شكله إيه؟ توك شو ولا سكتشات كوميدي و دراما للكبار فقط ولا إيه؟
أبلة فاهيتا: تركيبة مرموقة وغير مسبوقة. بين الرياليتي شو والمسلسلات المكسيسكي، وبها الكثير والمثير من الترتر والعبث الوسطي اللذيذ، تركيبة أنا بنفسي عملاها تاكل ريموتك وراها.
زحمة: وهيبقى فيه ناس حقيقية ولا كلهم عرايس؟
أبلة فاهيتا: عرايس!! واحنا مالنا احنا بالعرايس ده أنا ما بطيقهمش، كله حقيقي زيي وزيك كده بالضبط.
زحمة: طب ممكن نعرف موضوع أول حلقة؟
أبلة فاهيتا: اول حلقة تعارف و استظراف بيني وبين جمهوري، ولو نجح انه يضحكني يبقى العلاقة دي ممكن تستمر واقدم الحلقة التانية.
زحمة: بيقولوا ميزانية البرنامج كبيرة قوي قوي صحيح الكلام ده ؟
أبلة فاهيتا: يوه بالآلافات، ماستخسرتش، من لوامع لليزر وطواويس بتنور في الضلمة..
وبارفع قضايا على الضيوف وبغطي منها على مصاريف الدوبلكس اللي مابتخلصشي.
زحمة: يعني بتقبضي كام ع الحلقة يا أبلة فاهيتا؟
أبلة فاهيتا: أهو يدوبك مكفي مصاريف المحامي والتعويضات لمرضعات بودي.
زحمة: طب الجمهور بيسأل و يتسائل : هيبقى فيه سياسة في برنامج أبلة فاهيتا؟
أبلة فاهيتا: لا للأسف الدوبلكس ماجابش مجموع، لا سياسة ولا هندسة ولا طب. من فنون جميلة وانت نازل. احنا بقينا عايشين في سياسة طول الوقت، ناخد اجازة بقى يوم الجمعة من ٩-١٠ بالليل.
زحمة: طب معلهش سؤال محرج شوية، صحيح إنك ناوية تملي الفراغ اللي سابه باسم يوسف ؟
أبلة فاهيتا: بيسو حبيبي زي البرواز اللي تشيله من الحيطة بعد زمن فيسيب مربع لونه فاتح وتكتشف منه اد ايه الحيطة اصفرت واتوسخت. مفيش حاجة تملى فراغه، بس ممكن تدعك الحيطة.
.زحمة: شكرا يا أبلة فاهيتا.
.
اضغط هنا لتعرف أكثر عن أبلة فاهيتا وبرنامجها الجديد
.
ا
