مجتمع

فيديو- زوج متهم بتعذيب زوجته: “ضربي عادي مايموِّتش”

هذه هي التفاصيل الكاملة للواقعة

زحمة

استنكر محمد أحمد، الزوج المتهم بتعذيب زوجته، أن يتم عرض مشاكله العائلية على الإنترنت، لتصبح قضية رأي عام متابعًا: «لقيت نفسي على النت، ولقيت إن الموضوع بقى فضيحة».

وأضاف خلال مداخلة هاتفية لبرنامج «هنا العاصمة»، المذاع عبر فضائية «سي بي سي»، مساء أمس الاثنين: «أنا ضربتها لكن مش للدرجة دي، أنا بضربها ضرب عادي ميوصلش للموت»، موضحًا أن لكل بيت أسراره وخصوصيته.

وذكر أن التقارير الطبية التي خضعت لها زوجته، أفادت بأن مدة العلاج في المستشفى تقل عن 21 يومًا، معقبًا: «معنديش ضبط وإحضار ومش فاهم إيه اللي بيحصل، وزوجتي واخداني عن حب، أنا عندي محلات والحمد لله مش مخللي بيتي محتاج أي حاجة».

وعقب: «أنا مموتش أنا مقتلتش، مضربتش مراتي الضرب اللي يموت، أو الضرب اللي هي فيه دلوقتي»، معبرًا عن رفضه الإفصاح عن الأسباب التي دفعته للتعدي على زوجته.

وبدأت القصة عندما نشرت شقيقة الزوجة صور الاعتداء عليها، على مواقع التواصل الاجتماعي “فيسبوك”، مكتوب عليها ”اللي ضربها الضرب دة وفضل حابسها من يوم الاتنين لحد يوم الأربعاء الفجر يعذب فيها كده ويضربها بأسلاك الكبلات الكمبيوتر وحزام ومشترك وكان بيخرم دماغها بسكينة وبيطفئ سجاير ورا ودنها وهي حاولت تنتحر وبالفعل عملتها بس ربنا شافها.. وكل دة كان بيعملوا قدام أبنهم الصغير عندة ٣ سنين.. وهو من نوع الشكاك أصلا ومكانش بينزلها من البيت حتي تروح سوبر ماركت.. ودي الصور اللي هعرف أنزلها ف باقي صور لجسمها مش هينفع أنزلها.. أنا بكتب الكلام عشان إحنا مش عايزين نسيب حقها وعاملين كل اللي علينا وعاملين محاضر وعايزين أي حد يساعدنا وتبقي قضية رأي عام ونفضحة ويتحاسب ويحس بوجع قلبنا عليها، وأنا بطلب منكم أي واحدة تشوف الصورة تحس بوجع قلبي عليها وتدعي عليه وتحسبن فيه”.

وكانت الزوجة، قد وصفت معاناتها لمدة ثلاثة أيام متصلة، في اتصال هاتفي مع موقع “القاهرة 24”، من قبل زوجها في شقتهم بمنطقة العبور، وقالت “بقى يشك كتير هو أساسا من الطبيعي مكنش بيطلعني ولا ينزلني وبيمسك التلفون بتاعي كتير، ببقي نايمة يدخل على الواتس وعلى الفيس ويمسك تليفوني براحته وأنا مكنتش بتكلم لأن مفيش حاجة عندي عادي، والفترة الأخيرة بقى بيدور بطريقة رخمة ويدخل ميلاقيش حاجة حتى الصور والمكالمات برضو”.

وأضافت “اتخانقت معاه وقولت لماما تعالي خديني ومشيت فعلا، وجه بالليل في نفس اليوم صالحني وكلم ماما وكلم بابا، لكنه كان بيستدرجني وأنا مكنتش أعرف، وكلمني 6 ونص الصبح يوم الاتنين وفضل يضرب فيا ومفيش أسباب ومفيش أي حاجة تخليه يعمل كده”.

وتكمل الزوجة الضحية: “اليوم الأول قعد يقولي بتكلمي مين، أختي بعتت صورة برجليها لابسه فيها خلخال، وبنجرب ميك آب وكده، وكنت حتى منزلهاه على الواتس آب وكنت بشكرها أنها جبتلي الحاجات دي، هو شاف الصورة وصمم أني أنا اللي فالصورة مش أختي وأنى بعتاها لواحد يشوف رجلي وبخونه معاه، وفضل يضرب فيا ضرب جامد جدا وأنا قعدت أقوله والله ما بتاعتي تليفونى كله معاك وبرضو فضل يضرب فيا عشان اعترف إني بخونه”.

وتضيف: “فضل يضرب فيا من صبح الاتنين لحد فجر الاربعاء، ضرني بسكينه في راسي وفي إيدي، ونزل لأهلي عشان يتكلم معاهم، وهو كان حبسني وواخد من التلفون، ومانع عني الكلام ضرب بس، فمسكوا فيه عشان يلحقوا يجيبوني من البيت، وماما جت خدتني ودتني مستشفى السلام وبعد كده المستشفى السعودي الألماني”.

وتباشر نيابة الخانكة التحقيق فى واقعة تعذيب زوج يدعى «عمرو. م»، زوجته «تقى. ح»، لمدة ٣ أيام متواصلة بالعبور.

الوسوم

مقالات ذات صلة

إغلاق