منوعات

ردًّا على “خليها تعنّس”.. فتيات يُطلقن “خلّيه يخلل”: هتستبدلونا بكائنات فضائية!

"خناقة" عبر "تويتر" بين الفتيات والشباب

على غرار حملة “خلّيها تصدّي”، التي تهدف إلى مقاطعة شراء السيارات الجديدة لمواجهة جشع تجار السيارات في المعارض، دشنت مجموعة من الشباب عبر مواقع التواصل الاجتماعي حملة أخرى تحت شعار “خلّيها تعنّس”، لمقاطعة الزواج، مرجعين ذلك إلى ارتفاع التكاليف والمهر ومطالب أهالي العروس المُبالغ فيها أحيانًا.

وكتب نشطاء: “لا ماهو مش بنتنا قشّارة بصل علشان تتجوز بأقل من ١٤ كيلو دهب ومحمد صلاح ييجي يغني في الفرح، وأنا بنتي ماتتجوزش بأقل من نص كيلو دهب وفيلا في جزر المالديف.. إحنا شباب متخرّجين وشغالين بدون الشهادة ممكن تلاقي مهندس شغال في مطعم ومحاسب كاشير والمحامي سواق ميكروباص، وتيجي تفكر في الجواز أبوها يقول لك بنتي ماينفعش ييجي لها شبكة أقل من بنت خالتها، طب يا عم الحج”.

وفي التعليقات قال نشطاء عبر موقع “تويتر”: “وزي ما شوفنا حملة (خلّيها تصدي) اللي ركنت العربيات في المواني هنشوف مع بعض حملة (خليها تعنّس) اللي هتركن البنات جنب أهاليهم، وبعدها هبقى أقول لكم حكاية الفيل والدرفيل.. حضرتك ماتجوزتش ليه لحد دلوقتي؟ مستنّيها تعنّس.. لاحظ أن إحنا بنعلي بخلّيها تصدي وننزل بخليها تعنّس على أساس أن إحنا معانا فلوس نتجوّز ونركب عربيات”.

ورفض أحد الرجال في حسابه الشخصي الحملة كاتبًا: “ما في شيء اسمه عنوسة، فيه مصطلحين اجتماعيين للناس فقط بكل مكان بالعالم أعزب/عزباء متزوج/متزوجة، كفاية استخدام المصطلحات المتخلفة التمييزية للانتقاص من الإنسان والتقليل من قيمته”.

الفتيات لم يتركن الساحة للذكور وحدهم، وشاركن بمجموعة من التعليقات الساخرة من الحملة، من بينها: “شوفتي لما الرجالة شالونا من دماغهم وشك نوّر إزاي.. وإنتم فاكرينا هنزعل ده إحنا هنعمل لولولي فرح.. وادي فلوس الجهاز اللي بابا كان محوّشها أجيب بيها لبس وأكل بلا جواز بلا هم.. لما هي تعنس إنت كمان هتعنس نعقل الكلام شوية.. ولمّا نعنس هتبطلوا تحرّش بقى.. يا ابني لو شايف نفسك براد بت قول لنا نلحق أنجلينا جولي قبل ما ترتبط تاني.. هو إنتم هتستبدلونا بكائنات فضائية مثلا!!”.

ولم تتوقف المعركة عن هذا الحد، بل دشنت الفتيات حملتي “خليك في حضن أمك” و”خليه يخلل”، وجاءت التعليقات: “حد عمل هاشتاج خليها تعنّس أحب أقوله إن الستات والبنات ليست سلعة ولا أظنك ترضاه على أختك أو بنتك وإذا كان هناك بعض الناس يغالون في طلبات الزواج فده مش مبرر أبدا للغباء ده، طيب البنات عملت حملة وسمّتها خليك في حضن أمك.. هتقدر تفتح بقك؟”.

وعلى الجبهتين، كانت هناك معارضة للحملتين، فكتبت ناشطة: “حملتين ضد بعض خليها تعنس وخليه يخلل، هذا مؤشر خطير على مجتمعنا ويحد من الترابط والامتناع عن ما حلله الله وهو الزواج والحب وزياده النسل، يا ريت مش كل حاجة ننقاد وراها دون معرفة النتائج السلبية”، بينما كتب آخر: “هو يقول خليها تعنس وهي تقول خليه يخلل أبوجيب مفلس، مبسوطين كده يعني كده كويس كل طرف فيكم عامل زعيم وريس”.

مقالات ذات صلة

زر الذهاب إلى الأعلى