ثقافة و فن

حملة اعتراض قوية على اعتزال بهجت قمر: مش بمزاجك.. ورسالة خاصة من “الهضبة”

أعلن الشاعر اعتزال تأليف الأغاني والتفرغ للأعمال الفنية الأخرى

أعلن الشاعر الغنائي، أيمن بهجت قمر، قرار اعتزاله كتابة الأغاني، لتصبح أغنية “مهرجان”، التي ختمت ألبوم “سهران” للهضبة 2020، هي آخر ما يكتبه من الأغاني، ليبدأ في التفرغ لكتابة الأفلام والمسلسلات والمسرح.

وصدم هذا القرار العديد من تلاميذه من الشعراء ىوالملحنين، الذين وجدوا كلمات أغانيه تعبر عن الفن الراقي، وأعلن بهجت قمر هذا القرار من خلال “بوست” نشره عبر حسابه الرسمي بـ”فيسبوك”، وأرجع سبب اعتزاله إلى الضغط النفسي الذي عانى منه خلال الـ28 عاما التي عمل فيها بمجال كتابة الأغاني.

بهجت قمر يعلن اعتزال تأليف الأغاني

وكتب أيمن بهجت قمر عبر حسابه الشخصى على موقع التواصل الاجتماعى “فيس بوك”: “بقالى فترة مش صغيرة بفكر جديا في اللي هقوله دلوقتي أنا قررت إن أغنية مهرجان هي آخر أغنية أنا هكتبها وخلاص هعتزل تأليف الأغاني.. هكتب أفلام مسرح مسلسلات لكن خلاص هبعد عن مجال الموسيقى هنتج بس”.

وتابع: “أنا بقالى 28 سنة بكتب أغاني وطول الوقت في توتر وضغوط، عاصرت أجيال كتير من ١٩٩٢ لحد دلوقتي، وخلاص قررت أرتاح من السبق ده، أنا آسف مش هرد على أى زميل يتصل بيا عشان محدش يأثر عليا”.

حملة اعتراض على قرار الاعتزال

وتعرض الشاعر أيمن بهجت، لحملة رفض قرار إعلان اعتزاله التأليف الموسيقي، من قبل صناع المزيكا سواء الشعراء أو الملحنين، مؤكدين أنه واحدًا من أهم أعمدة الموسيقى في مصر والوطن العربي، وأن هذا القرار ليس قراره وحده، لأنه ملك الشعب المصري الذي يحتاج أغانيه في الفترة المقبلة.

– تامر حسين: مش بمزاجك
كتب الشاعر تامر حسين تعليقا على هذا القرار: “مش بمزاجك حضرتك احنا لينا فيك والله ما بهزر ولا بأجاملك وبنكبر أكتر وأنت معانا في أي ألبوم وأنت أثرت وسبت نجاحات وعلامات في قلوب كل اللي بيحبوك وكل زمايلك والتوتر والضغط رغم صعوبتهم النفسية النجاح بينسي كُل ده مفيش راحة يابو بهجت”.

– أحمد المالكي: فنك بيمتع الناس ودايما مستنينه
كان تعليق الشاعر أحمد المالكي: “الخبر ده اتسبب في نفس الضيق اللي حسيناه كأهلاوية يوم اعتزال أبوتريكة.. من بعده الكورة عندنا ملهاش طعم.. بس لاعيب الكورة لازم يبطل في سن معين.. لكن الموهوبين قوي اللي زيك لازم يستمرو طول العمر لأن فنك بيمتع الناس ودايما مستنينه.. الضغط كبير فعلا بس أنت الكبير ودايما قدها وفضهرنا كلنا.. كل الناس بتحبك يأبو بهجت ومستنين ترجع في القرار ده بأذن الله”.

 صابر كمال: الفن محتاجلك يا أستاذ
وقال الشاعر صابر كمال: “ما ينفعش يا أستاذ، الفن محتاجك جدًا بالذات في التوقيت ده، عارفين ومقدرين حجم الضغوطات والإرهاق والتعب البدني والذهني، بس أغاني من غير أيمن بهجت قمر هيبقى في حاجة غلط، أتمنى تعيد نظر، أنت في قمة عطائك، وربنا يقويك ويعينك”.

– بلال سرور: المرحلة محتاجاك
وجه الملحن بلال سرور رسالة لأيمن بهجت قامر قائلا: “خد بريك ماشي.. اكتب لما تعوز بس ماشي.. بس لسه عندك كتير للناس.. والمرحلة محتاجاك.. مش موافقين يا أبو بهجت”.

أحمد حسن راؤول: مابقتش ملك نفسك
وقال الشاعر أحمد حسن راؤول: “أنا أسف يا أستاذ أيمن بس حضرتك بعد السنين دي مابقتش ملك نفسك.. حضرتك ملكنا كلنا.. القلم اللي عشناه معاه الحب والجرح والوطن والفرحة ماينفعش في لحظة يتقصف..احنا اتعلمنا منك.. وهنفضل نتعلم منك.. والفن عمره ما كان سبق.. الفن بناء وكل واحد بيحط طوبة عشان نعمل شكل لبلدنا.. وحضرتك من ضمن أساس المبنى ده.. فمتخليهوش يقع.. مبقاش بمزاجك”.

– شادي نور: ماينفعش
وكان تعليق الشاعر شادي نور: “ماينفعش انا والله مقدر كل اللي مخليك تقول كدة وتقرر كدة بس ولا أنت هترتاح كدة لان دة انت ولا احنا.. ولو أقدر أقول اقتراح خلى قرارك الشغل الفترة اللي جاية بمزاجك بس وهو دة المطلوب أصلا لأن دة اللى هيمزجنا.. وربنا يخليك لينا مبدع في الأغاني والسينما والمسلسلات والمسرحيات والإعلانات وكل اللي بتحب تعمله”.

رسالة عمرو دياب

 

وفي مداخلة هاتفية مع برنامج “الحكاية” مع عمرو أديب الذي يعرض عبر قناة MBC مصر، أبدى دياب تعجبه من قرار أيمن بهجت قمر، خاصة أنه لم يقرأ التغريدة التي كتبها الأخير وأعلن من خلالها عن قراره.

قال دياب إنه يعرف أيمن بهجت قمر منذ عام 1998، وأنه يعمل معه حتى أحدث ألبوماته “سهران”، مشيرا إلى أنه من أفضل الشعراء في الـ20 عاما الأخيرة، وهو لا يعرف سبب قراره هذا لكنه في نفس الوقت لا يعتقد أنه سينفذه.

وتابع مؤكدا أن أيمن بهجت قمر ناجح في مجال تأليف الأغاني ومن أفضل الشعراء، ودائما كان يخبره أنه ينشغل بتأليف الأفلام والمسلسلات، مما يجعله يفتقده في تأليف الأغاني.

وأكد عمرو دياب أنه عندما يغني في أي حفل أغنية كتبها له أيمن بهجت قمر يرددها معه الجمهور، مهما كانت الأغنية قديمة.

وبعد ما رأى بهجت قمر كل هذا الحب من زملائه وتلاميذه والجمهور قرر التوجه برسالة أخرى.. هل تعني أنه قد يتراجع عن قراره؟

وكتب أيمن بهجت قمر على حسابه الخاص على موقع “فيسبوك”: “مش اي حد بيشوف المحبه دي في حياته وهو عايش.. غمرتوني بحب كبير كتر ألف خيركوا”.

الوسوم

مقالات ذات صلة

إغلاق