ثقافة و فنفيديو

العنبرة ..أعظم إلقاء لأحمد فؤاد نجم

 

فيديو: شاهد قصيدة “العنبرة” من حفل باريس 1986  للشاعر الكبير أحمد فؤاد نجم الذي تحل اليوم 3 ديسمبر ذكرى رحيله الأولى

 

 

عنبـــــــــَّـــــــــر .. كله يسمع
شخشخت بالزهر مانصفنيش ولا مرة
وراهنت بالمهر والبقشيش على مرة
والسجن للحُر وان كان مر ..ولا مرة ..
فكرنى بالتوبة من دى النوبة .. ولا مرة !
بعد مساء الخير .. على حراس الليل
كينجى برينجى تشنجى .. كله لبط و لومانجى
بس البدلة بتفرق و العيب على المخزنجى..
الاوله للنبى .. والتانية ايوب ..
والتالته غربتى .. والرابعة المكتوب
والخامسة .. اللى افترى حتماً يبات مغلوب
الاوله يا نبى يا محرر الانسان.. يا بلسم المُبتلى يا نجدة الغلبان
كرمت صنف البشر عن طايفة الحيوان
ورفعت سيف الهدى عالى على الطغيان
و غسلت ارض العرب من بقعة الاوثان
وزعقت يا امتى .. فى سائر الازمان
الظلم يوم لو حكم .. والحق يوم لو هان
يحرم عليك المطر والفى والعمران
تسرح بحورك عطش .. فى الزرع والإنسان
ويجر فيك الحنش وتحوم الغربان ..
ترمى الخراب ع الجبل والسهل والوديان
النور يغور م السما .. وجه القمر ما يبان
والشوف يضيع فى العما والضلمة والاحزان
والخوف يطيح فى البشر من قسوة السجان
الناس تخاف بعضها .. وتخوف السلطان
والتانية ، قولت أنا آيوب وانا مثلين
آيوب و مهما ابتلى ..ايوب يروحلى فين
آيوب صبرله يومين
طلعت عليه القصص واتنادى بالاسمين
عدوه من الانبيا والصالحين الاتنين
وانا اللى صبرى هنا جوة اللُمان صبرين
صبرى على خطفتى من عزوتى والبين
وصبر تانى على حكم الزمان يا عين
الندل فينا حكم .. والندل حكمة شين
حكم البقر ع البشر .. بشريعة القرنين
وحق تربة نبى طه كحيل العين
هالبت يوم يتنصب بدال الميزان اتنين..
وانظر بعين الرضا للعدل فى الميزانين
والتالته، غربتى فى عالم الاندال
الندل فيه احتمى .. والحُر فيه انطال
والواطى لما اعتلى .. اجرله كام طبال
الشحط والبلطجى واللص والمحتال
و الكودية لبست شنب و اتحزمت بعقال
ومين يحب النبى .. سقفة كمان يا عيال
الرقص دار فى البلد عمال على بطال
واللحم لما اتكشف .. غطى على اللى اتقال
لا سمعنا صوت فى النغم .. ولا شعر فى الموال
خنقوا الكلام فى الغُنى .. والرنة فى الخلخال
واحد يا موحد الواحد
اتنين يا جد الحسين
تلاته يا سو الشماته
اربعة يا حبر المطبعة
خمسة يا عزمى يا حى
سته يا بكرة يا جاى
سبعة يا قلبى يا مايل
تمانية يا شوق الزمايل
تسعه يا دنيا يا واسعة
عشرة يا خاين يا حشرة
اعرفكم جميعاً ان السجن سور ..
اعرفكم جميعا ان الفكرة نور
و عمر النور ما يعجز يأزح الف سور
و عمر السور ما يقدر يحجز بنت حور
واعرفكم جميعا ان الظلم شايخ
واعرفكم جميعا باب السجن خايخ
و اعرفكم جميعا ان مالهش اكرة
و اعرفكم جميعا انه هيبقى زكرى
واعرفكم جميعا ان الثورة فكرة
وابشركم جميعاً .. ان الوعدة بكرة
والنور عندنا وعندكوا .. يا حبايب

الوسوم

مقالات ذات صلة

إغلاق