سياسة

الداخلية تُهدي قصيدتين للأمهات: مين حبيبك؟

“الداخلية” تهدي الأم قصيدتين شعريتين بمناسبة عيد الأم

Mideast-Egypt_Horo-22-e1453653966788

أ ش أ

أهدى قطاع الإعلام والعلاقات في وزارة الداخلية، الأم قصيدتين شعريتين بمناسبة الاحتفال بعيد الأم الموافق 21 مارس من كل عام.

وجاء نص القصيدة الأولى:

“جاني تاني وجابلي وردة

كان فاكرني هاخدها وأرضى

قاللي جايلك من هناك

أحكي عن كل اللي فات

قال يا أمي

اوعي يوم تفتكري إني

راح أسيبك

مين حبيبك

لو ما ضحى عشان عيونك

لو ما كان بالروح يصونك

لجل ترضي يكون حبيبك

الحكاية..

الوطن نادى يا أمي

كنت أسيبه؟

لو يضيع الحق منُّه.. مين يجيبه

غير ولاده..

صدّقيني..

إن حضن الأرض لما

بين إيديه ياخد شهيد

راح يلاقي نفس حضنك

إنتي أمي

والبلاد الغالية أمي

اوعي مرّة ف يوم تخافي

حضن أرض بلادي برضه

حضن دافي

حضن دافي”.

أما القصيدة الثانية فكانت إهداء لأمهات الشهداء بمناسبة الاحتفال بعيد الأم:

“يا أمّي ليه يوم تحزني

والجنة لسه فـ انتظار متزينة

اللي على إيديه النهار جه أرضنا

يا أم الشهيد

ابنك بطل.. بالتضحية

ولولاه ما كانت أغنية

للانتصار

الجنة لسه فـ انتظار

طلع النهار

كان البطل ابنك هناك

سابق بروحه خطوته

أفديك بروحي يا وطن

أفديك ومن دمّي التمن

الجنة لسه فـ انتظار متزينة

يـا أمي

قولي للي جايلك من صحابي

واللي جايلك من زمايلي

إني أجمل حاجه إنتي

يا مصر

روحي فيكي فين ما كنتي

إنتي جنة أرض ربي

يا أمي اوعي تحزني

الشهادة هي جنة للشهيد

يوم شهادتي يبقى عيد

اسأليني راح تلاقي قلبي من جوه سعيد

يبقى ليه يـ أمي حزنك

جنة فاتحة حضنها من بعد حضنك

يا أمي اوعي تحزني

يا أمي اوعي تحزني”.

مقالات ذات صلة

زر الذهاب إلى الأعلى