مجتمع

خطيبة المجند ضحية المستشار: كان عايز يدبسني في قتله (فيديو)

تفاصيل قتل مجند على يد مستشار في مدينة نصر

المجند
من اليمين بوسي والشمال المجند مؤمن (القتيل)

كشفت “بوسي” خطيبة المجند الذي قًتل على يد رئيس محكمة جنايات بمدينة نصر عن تفاصيل المشاجرة التي وقعت بين المستشار وبين “مؤمن” خطيبها والتي انتهت بأن رفع المستشار طبنجته وقتل خطيبها.

وقالت بوسي خلال ظهورها في برنامج “العاشرة مساءً” مع الإعلامي وائل الإبراشي إنها كانت عند صديقة والدتها التي تسكن في نفس العمارة مع المستشار وكان خطيبها ينتظرها في الشارع، وحين نزلت أمام مدخل العمارة وقفت تتصل بخطيبها ليقلها من أمام البناية، فجاء هذا الرجل –المستشار- وهو يحمل هاتفه وطبنجته ظاهرة يسألها بصوت عال “انتي كنتي بتعملي ايه فوق وكنتي عند مين؟”.

وواصلت بوسي  “رديت عليه وقلت له “وحضرتك مالك؟، نده على البواب بتاع العمارة اللي جنبنا، وقاله “دي كانت بتعمل ايه فوق” كلمت خطيبي، ولما جه، لقاه بيتكلم معايا وبيشوح، فنزل خطيبي قاله، “كلامك معايا أنا، خير إيه اللي حصل؟” قلت له انا هقولك ايه اللي حصل، وقلت له اللي حصل، مؤمن بيفتح باب العربية عشان يدخلني ويقفوا يتكلموا راجل لراجل، قام المستشار قفل باب العربية بعنف شديد، بعدين مد ايده حاول يشدني من هدومي لولا أن مؤمن رفع كتفه عشان يمنعه“.

وأضافت “مؤمن زقه عشان يدخلني جوة العربية، ساعتها المستشار دة دة حط إيده على طبنجته، فمؤمن قاله اتكلم معايا انا، المستشار قاله “دي حرامية طالعة تسرق”، رد مؤمن قاله “دي بنت طالعة العمارة حضرتك شايفها إيه”، بعد كدة فتح باب العربية ودخلني جوة العربية وقالي كلمي الناس اللي كنتي عندهم فوق، وقولي لهم ينزلوا عشان يبان أن أنا معملتش حاجة غلط، فجأة لقيت باب العربية اتقفل جامد ولقيت مؤمن مرمي على العربية ووقع على الأرض، والمستشار دة نزل على الأرض يكمل ضرب، وضربوا بعض هما الاتنين، بعد كدة مؤمن ضربه ضربة اختل فيها توازنه، ولسة بيقوم، مؤمن بيقوله صلي على النبي نتفاهم، لقيناه بيطلع طبنجته، وضرب مؤمن طلقة في صدره من الناحية الشمال.

وتابعت بوسي ” وقع على ايدي وكانت هدومي كلها دم، اتشاهد وانا حسيت انه مات، لقيت شفايفه بتزرق، وعينيه بتطلع لفوق، وأول ما المستشار دة شافه رفع إيده على رأسه وقال “ايه اللي انا عملته دة”.

وواصلت ” ببص حواليا لقيته اختفي، وبعد دقائق لقيت جاي بعربيته بيقولي اركبي انتي وانا هوديكوا المستشفي، اركبي انتي بس، أنا خفت ومسكت في ايد ولد وقلت له ارجوك اركب معايا، ركب معايا 3 شباب، وروحنا المستشفي، واحنا نازلين رايحين المستشفي قابلنا الإسعاف، وطلعت معاه الإسعاف، ببص على المستشار والعربية اختفي”.

وقالت ” في تخيلي هو كان عايزيني أنا ومؤمن بس اللي هو فعليًا ميت، أنه كان عايز يخلص عليا، ولا يدبسني إن أنا اللي قتلته، لأنه اختفي بعد ما روحنا الإسعاف”.

وأضافت “طول وقت الخناقة مؤمن كان بيقوله صلي على النبي نتفاهم”، وأكملت ” وفي التحقيقات راح يقول مرة أن الشقة فيها خلية إرهابية، ومرة تانية يقول أنه شافني أنا ومؤمن في وضع مخل فاضطر أنه هو يتدخل؟!

وعقب الإعلامي وائل الإبراشي، أنه سأل جهة التحقيق في القضية ونفت هذا الحديث، ثم قال “إن المستشار تم القبض عليه في الحال، لأنه في حالات التلبس لا تنتظر النيابة أن يتم رفع الحصانة عن القاضي لإلقاء القبض عليه”.

وقالت والدة بوسي التي كانت تحضر الحلقة أن “مؤمن تخرج في الجامعة الألمانية، وكان يقضي فترة التجنيد، وينتظر خطيبته حتي تنتهي من دراستها ليتمّوا إجراءات الزواج”

وأمرت النيابة العامة بحبس المستشار 15 يوما على ذمة التحقيقات

مقالات ذات صلة

شاهد أيضاً
إغلاق
زر الذهاب إلى الأعلى