أجمل 100 بيت شعر للأبنودي

  أجمل 100 بيت شعر  للشاعر الكبير عبد الرحمن الأبنودي

زحمة– اخترنا لك أجمل 100 بيت ومقطع شعري من قصائد وأشعار ودواوين وأغنيات الراحل العظيم عبد الرحمن الأبنودي الذي غادر عالمنا يوم الثلاثاء 21 أبريل تاركا رصيدا لا يبارى من القصائد والدواوين الرائعة

والأغنيات البديعة التي أثرت وجدان المصريين  وملأت حياتهم فنا وجمالا

نتمنى لك قراءة سعيدة مع هذه المختارات التي تمثل جزءا صغيرا من عالم الأبنودي الكبير

ويسعدنا أن تكتب البيت الذي تفضله من أشعار الأبنودي في التعليقات

100bet

( 1)

 “أنا صوتي مني وانا ابن ناس فقرا، شاءت ظروفي إني أكتب واقرا،فباشوف وباغنّي، والفقرا باعتيني، ياناس ياهوه، قبلن ما اقول قولة، اتأكدوا إن صوتي ده وصدر مني

(سوق العصر)

( 2)

“يا عيونك النايمين ومش سائلين، وعيون ولاد كل البلد صاحيين”

(تحت الشجر يا وهيبة)

( 3)

“يبقى القمر قاربنا، والليل بحر مهاودنا، والنسمة اللي تاخدنا ترجع شايلة الحكاية

(الهوى هوايا)

( 4)

الجهل مريح يا فاطنة، عدم العلم مريح، عدم العلم عيون تنعس في الليل، ضحكة من القلب ، من القلب صحيح

(جوابات حراجي القط)

( 5)

قلبي يا بلاد غريبة بتنوّرها الدموع

( أحضان الحبايب)

( 6)

تقيلة خطوة الزمن، تقيلة دقة الساعات

(ساعات ساعات)

( 7)

يا أمي، وان يسألوكي  لا يترعش لك حضن، ولا تحسي بحزن وتقولي:مات في السجن، ساعتها يبقى  الحزن بلا موضوع ووالسجن  بلا موضوع والموت بلا أكفان

(المتهم)

( 8)

وبلدنا اللي كنا بنمشيها في نص نهار، كان القطر في لحظة فاتها بمشوار”

( جوابات حراجي القط)

( 9)

بس الحزن إذا طال  القلب..خلاص .. قول ع الراجل يا رحمن يا رحيم ..الشقى مش متعب، التعب الأكبر تعب النفس في آخر العمر، لما تلقاك عمرك كله لم دقت الا الحزن، والعمر بيخلص قدامك ومحطته على بعد الرجل

(سيرة  أحمد اسماعين)

( 10)

تمرّ صورتك اتبسّم، الابتسامة تعذبني، كل الحاجات حواليا تدور زي الحيطان بتداري النور وقلبي من بعد الطيران ما حيلته إلا جناح مكسور

(كل الحاجات )

( 11)

عشب الربيع مهما اندهس بالقدم، أو انتنى للريح، يشب تاني لفوق يغني للخضرة وطعم الألم

“المتهم”

( 12)

زنزانتي لو  أضيق، أنا من ورا السجان، في العتمة باتشعلق، حتى على الدخان

( فيلم البريء)

( 13)

من يوم ما عينيكي يا فاطنة بلّت شباك القطر، لسوعتي بدمعك ضهر يدي، قلت لك قبل معوصل عتلاقي جوابي جاي، نهنهتي وقلتي بعتاب: النبي عرفاك كداب

“جوابات حراجي القط”

( 14)

كل اللي عايشين م البشر من حقهم يقفوا ويكملوا، يمشوا ويتكعبلوا، ويتوهوا أو يوصلوا

(أبو العلا البشري)

( 15)

،أدباتي، أراجوز، نديم صاحبي وخلاني،  زجّال مهرّج مرّكب صوتي في لساني

(مسلسل النديم)

( 16)

بلدنا ع الترعة بتغسل شعرها، جاها نهار ماقدرش يدفع مهرها

(عدى النهار)

( 17)

مش كان يبقى أحسن، لو لمتنا حبة، ده الموت يبقى أهون، لما نقابله صحبة

(مسلسل النديم)

( 18)

بتحب موال النهار ، لما يعدي في الدروب ،ويغني قدام كل دار”

(عدى النهار)

( 19)

وانت لو جالك فقير، كنت تشوي قلبك الطيب تحطوله في رغيف؟”

(الخواجة لامبو العجوز مات في أسبانيا)

( 20)

“الأرض مش أرضي، ولا العيال ولدي، أمال كده مالي شايل همها لوحدي؟”

(من أغاني مسلسل النديم)

( 21)

احنا شعبين شعبين شعبين، شوف الأول فين والتاني فين، وادي الخط ما بين الاتنين بيفوت

اقرأ ايضاً :   رئيس تونس يكرّم جميل راتب: عمرنا واحد لكنك ما زلت صغيرًا (فيديو)

(الأحزان العادية)

( 22)

“نهرب من الصافيين إذا بكيوا، ونحسد الباكيين إذا ضحكوا

(   مسلسل أبو العلا البشري )

( 23)

في عينيها نار وجنة وعند وشدة وهوادة، البنت من الدهاشنة واسمها فؤادة”

( شيء من الخوف)

( 24)

أديكي عمري بحاله يابوي، واديني إنتي الفرحة ياعين

(التوبة)

( 25)

وسّع طريق للقدم، اللي مصاحبها الألم، من إمتى نده العذاب، واحنا مقلناش نعم؟

(مسلسل المعذبون في الأرض)

( 26)

حكموكي ما حكموكي، برضه المصري مصري والمملوك مملوكي

(مسلسل علي الزيبق)

( 27)

“لإمتى فيك يمشي جريح، يا طريق الآلآم، ولإمتى فيك يفضل يصيح، مسيح وراه مسيح وراه مسيح، على أرضها

(المسيح)

( 28)

ابن الوطن أبو جيب فاضي قال مش راضي، إن كان مافيش عدل يا قاضي موّتني شهيد

(مسلسل النديم)

( 29)

بالليل فكرك يطوف، والنوم خطوف خطوف، تبقى ع البرّ لسة وتقول يا ناس غريق

( من حبك مش بريء)

( 30)

في إيديا المزامير، وفي قلبي المسامير”

(عدوية)

( 31)

لازودك بالزاد واديكي قنديلي، واصرّلك عمري وقلبي في منديلي، وانتي حمامة صيف باقي المواسم طيف لودنيتي ع الكيف كان النهاردة العيد

“مسلسل النديم”

( 32)

الهوى بعتر ضفايري، إيه قصده معايا؟”

(يا مّه يا هوايا)

( 33)

جاي من بلادي البعيدة لا زاد ولا مية، وغربتي صاحبتي بتحوم حواليا، وانتي تقوليلي بحبك، تحبي إيه فيا؟  حب إيه ده اللي من غير أي حرية؟

 (يونس)

( 34)

“اللي مانعني من الموت اليوم اللي أشوف “علي” فيه متهني وفاتح بيت” ساعتها اقول للدنيا ضحكت عليكي خلاص غوري

(جوابات حراجي القط)

( 35)

يا قمر يا رغيف بعيد، النهاردة الحد عيد، الفقير ليه مش سعيد؟

(الخواجة لامبو العجوز مات في أسبانيا)

( 36)

لو مش هتحلم معايا مضطر أحلم بنفسي

(أبو العلا البشري)

( 37)

من إمتى شفنا الرأسمال يتفسح؟ من إمتى شفنا الرأسمال إنساني؟ جاي  يطمس الأسماء ويمحي الملمح ويحطنا في السلسلة من تاني

(سوق العصر)

( 38)

قصر الوالي طبعا عالي، مليان حتى لو الكون خالي

(مسلسل علي الزيبق)

( 39)

نص العمر اللي راح، قضيته هناك غريب، لميتك لك الجراح وجايبهالك تطيب

(الليلة ديا)

( 40)

احنا ولاد الكلب الشعب، احنا بتوع الأجمل وطريقه الصعب، والضرب ببوز الجزمة، والموت في الحرب”

(الأحزان العادية)

( 41)

انتوا التوقيف، واحنا السير

“الأحزان العادية”

( 42)

خايفة البكا يدوّب رمشي

( قاللي الوداع)

( 43)

” إن رحت معاك، وطاوعت هواك، حاهرب على أول مركب هاتعدي عليّا، ان شالله تاخدني لشط الجنة الدهبية” “

(يا ابو العين العسلية)

( 44)

الدمّ اللي في إيديا بالليل ينده عليّا ، ويقوللي: قتلت مين؟

(البريء)

( 45)

وان صرخ القول في الحشا عمر الخشم الحر ما يقدر يقعد مقفول

(جوابات حراجي القط)

( 46)

“أنا ما فرحت إلا بكي، ولا بكيت إلا وكل الكون بكي، وحياتي مشوار الرحيل منك لكي”

(مسلسل النديم)

( 47)

آخر مرة امَا سيبتك كتمت الشكوى ليه، مش كان احسن حاسيبتك، وعرفت القصة إيه؟ لكن محاسبتكيش، وقلت لك مفيش ، كأنك يا حبيبتي أمرك ما يهمنيش

(برة الشبابيك)

( 48)

يالولا دقة إيديكي ما انطرق بابي، طول عمري عاري البدن وإنتي جلبابي، ياللي سهرتي الليالي يونسك صوتي، متونسة بحس مين يا مصر في غيابي؟

اقرأ ايضاً :   قرار عصفور: التنوير أولا

(مسلسل النديم)

( 49)

دلوقتي حتى بخاف حزني يبعد عني

(كل الحاجات)

( 50)

اسمك عدوية يا صبية،  ورموشك شط”

(عدوية)

( 51)

تعرف تقول جودنايت؟ وتفتح السمسونايت..وتبتسم بالدولار؟

(سوق العصر)

( 52)

طول ما انت في العالي يا لاسمر، مش راح تشوف حالي”

(بالي معاك)

( 53)

“بيوت الناس لا حيطان ولا ساس، ولا ليها لون ولا ليها مقاس

( مسلسل علي الزيبق)

( 54)

قصص الحب الجميلة أكيد  ناقصها قصة، وبين كل الأغاني في غنوة حب ناقصة”

( قصص الحب الجميلة)

( 55)

”     يا صاحبي يا صديقي ياللي طريقك طريقي ده انا يوم ما اعيش لنفسي ده يوم موتي الحقيقي         “

(أبو العلا البشري)

( 56)

إذا مش نازلين للناس فبلاش، إلزم بيتك، بيتك بيتك، وابلع صوتك، وافتكر اليوم ده لإنه تاريخ موتي وموتك

( الدايرة المقطوعة)

( 57)

ياللي مفهمينش ابتسامة الشهيد، احنا بنفهم بعض

( المتهم)

( 58)

شفت في عينيكي المداين، والبيوت أم الجناين والغيطان أم السواقي والولاد امات طواقي والشطوط ام النخيل، شباكين ع النيل عينيكي

(شباكين ع النيل عينيكي)

( 59)

ياللي فطمتي النديم،  رديه صغير السن، باسكّت الجرح يسكت، ينطق التاني

(مسلسل النديم)

( 60)

والله صورتك دي تنفع تزيّن الجرانين

(عدوية)

( 61)

أمّي ، ولو مالت عليا الحيطان أمي، ولو يجري ورايا النخل، وانا غيرها ماليش إنسان ولا بلد ، ولا مكان ولا أهل”

(مسلسل النديم)

( 62)

الوطن هو الديانة، الوطن ، من غير زنازينهم، خيانة

( المتهم)

( 63)

قدم البيت ، اتهدت قبله بيوت وبيوت، وأصيل هوة، مستنيني لما أموت

( يامنة)

( 64)

ياللي عيونك شمعة وضحكة وبحر ونسمة صيف

(حبيبي يا اسمراني )

( 65)

“وتقوللي دولة صديقة؟ مين الي صدقها؟ أمال  ده مين اللي قتلني في السويس وفي بورسعيد؟ أيام ماكانت بورسعيد بورسعيد؟ مين ده اللي كان يقتلني يومي ع الكنال؟ والوقت، وسع يا جدع للرأسمال، يا فقرا بكرة تلاقوا شغل: زبال ، وشيال”

(سوق العصر)

( 66)

“القبضة قابضة ع الحديد ليفرّ، القاضي يستغبى والمتهم بيصرّ”

“المتهم”

( 67)

تعبت اقرا الوجوه بحثا عن الإنسان، تعبت اقرا اليفط بحثا عن العنوان، كل الخرايط ما توضح، تبهت الأوطان

( المتهم)”

( 68)

الواد كما أي عيل في عيال ناس البلد، يهوى صوت السواقي لما تملى البلد، والقلب اخضر  مزهزه لا مكر ولا حسد

(شيء من الخوف)

( 69)

” ده دمي وللا الربيع؟ لاتنين بلون أخضر، وبابتسم من سعادتي وللا أحزاني

(الميدان)

( 70)

الحزن محاوطكي وهمك تاعبكي وليه مش قادرة تبكي؟

(النديم)

( 71)

الحلم اللي حلمته في الصبح بيتفرد، يصبح ذنب ابلد يصبح هم البلد، والضحك اللي ضحكته أهو سمعاه البلد، صرخة حزن ونكد، صرخة بنت وولد

(شيء من الخوف)

( 72)

يضحك نبكي احنا طوالي، أمال ازاي يبقى الوالي؟

(علي الزيبق)

( 73)

ومهما أنزل بلد انزلها بالجسد، لكن القلب راحل، له في السواحل ساحل، لغيره ما انوجد، سايب قلبي في حاراتك سايب صوتي في سكاتك، وخضرتي في نباتك يا مصر، وتنّي راحل

( مسلسل النديم)

( 74)

عاد اللي يعجّز في بلاده، غير اللي يعجّز ضيف

( يامنة)

( 75)

لا الصوت ده صوتك ولا أغانيكي عاجباني آهين يا محروسة قد ما إنتي واحشاني، مش عايز اشوفك وخللي ما بينا حيطة وباب

اقرأ ايضاً :   بكرة في وسط البلد.. الثلاثاء 29 مارس

(النديم)

( 76)

الموت مجرد سفر، لا شوك ولا زعابيب ولا عفر

(المتهم)

( 77)

يا قبضتي دقي على الجدار ، لحد ليلنا ما يتولد له نهار، يا قبضتي دقي على الحجر لحد ما تصحّي جميع البشر، لحد ما تتفسر الأسرار”

( البريء)

( 78)

“وان يسألوكي، قولي مسافر بعيد، رايح يقابل العيد في  قلعة فوق الجبل وللا في سجن حديد، في غرفة ضيقة في ساحة الإعدام برمي الرصاص، وللا الخلاص في خية المشنقة، مشوار بعيد المعنى عالي الصوت، إن مرحتوش أموت وعالمي يتقفل، والشمس تلملم خيوطها وتنسحب في خجل

(المتهم)

( 79)

في الليل يا حراجي تهف عليا ماعرف كيف، هففان القهوة على صاحب الكيف”

( جوابات حراجي القط)

( 80)

اقتلني ، قتلي ما هيعيد دولتك تاني

(الميدان)

( 81)

حبيتك يا حبيبي من غير ما اسأل سؤال

( عيون القلب)

( 82)

مراكب الهم ترسي ليلاتي في جراحي

(الاستعمار العربي)

( 83)

لسة مشبعتش طوافة يا للي بتطوف من سنين؟ يا قمر مولود في يافا واتقتل في دير ياسين؟

(الموت على الأسفلت)

( 84)

على كرسي ف قهوة في شارع  شبرا قعدت ..وجابلي كباية الشاي الجرسون، كباية شاي القهوة غير كباية  شاي البيت خالص، بصيت له كتير مش عارف ليه،  من مدة طويلة ماشفتش حيّ

(ديوان الزحمة)

( 85)

استشهد تحتك وتعيشي إنتي، يا بيوت السويس

(يا بيوت السويس)

( 86)

“عارفة يا مرتي الراجل في الغربة يشبه إيه؟ عود درة وحداني في غيط كمون”

(جوابات حراجي القط)

( 87)

ربنا رزقه بجهل، غانيه عن كل العلم

(الأحزان العادية)

( 88)

الليل جدار، إذا يدن الديك من عليه، يطلع نهار

(الأرض والعيال)

( 89)

والنبي يا حراجي لو اطول قلبك، لاقطع بسناني الحتة القاسية فيه، شهرين يا بخيل ؟ ستين شمس وستين ليل؟

( جوابات حراجي القط)

( 90)

“”وكأنك اتخلقتي عشان تخافي عليا

(أنا مهما خدتني المدن)

( 91)

إوعى تعيش يوم واحد بعد عيالك، إوعى يا عبد الرحمن، في الدنيا أوجاع وهموم اشكال والوان الناس مابتعرفهاش، أوعرهم لو هتعيش بعد عيالك ما تموت، ساعتها بس..هتعرف إيه هو الموت

(جوابات حراجي القط)

( 92)

نجمة وطلعت والسما نعسانة، ندهت بعلو الضوّ قالت يانا، إزاي تناموا ازاي وانا سهرانة، هتلاقوا أجمل من كده ليلة؟

(  أبو العلا البشري)

( 93)

صفّي الأغاني على الأسفلت وانا غاوي، ما اغني غير وسط حافيينها وعاريينها

(صحت المدينة في يوم مالقتش جناينها)

( 94)

هربان من الجراح، وللا من الهروب؟ غريب، شايف البراح أضيق من الدروب

( ذئاب الجبل)

( 95)

من بعد ما دقت زحام الناس، تحبسني ويا قلم وكتاب؟

(مسلسل النديم)

( 96)

وانتي بترحي الرحى، على مفارق ضحى، وحدك وبتعددي، ما تنسينيش يامّا في عدودة

(ناجي العلي -الموت على الأسفلت)

( 97)

“احنا الصوت، ساعة ما تحبوا الدنيا سكوت

(لأحزان العادية)

( 98)

السن اللي تقدّم ، علّمني ازاي لا أزعل، ولا افرح ولا أندم، وإحساسي بموتي، أصبح أهون هبابة”

(الكتابة)

( 99)

ماتمنعوش الصادقين عن صدقهم”

(أبو العلا البشري)

( 100)

إذا جاك الموت يا وليدي موت على طول،  اللي اتخطفوا فضلوا صاحيين في القلب كإن محدش غاب”

( يامنة)

5 تعليقات

  • تعبت أقرا الوجوه بحثا عن الإنسان
    وتعبت أقرا اليفط بحثا عن العنوان
    كل الخرايط ما توضح تبهت الأوطان
    قصيدة “المتهم”

  • مش فاهم اللى حاصل ، لكن بقلبى واصل ، واللى مش فاهمه عقلى بتشرحه السلاسل
    “البرئ (ياقبضتى) “

  • “يا قلوب بتنزف دم فى العنمة ، يا قلوب بتنزف دم و تغنى ، سجنونا قاصدين يسجنوا الكلمة ، والكلمة غصباً عنها وعنى ، طلعت من القضبان و مـ الأسوار”
    “البرئ”